Гісторыя заснавання

9 - 11 верасня 2003 года ў Баранавічах прайшла незвычайная канферэнцыя. У ёй прымалі ўдзел прадстаўнікі розных СМІ. Яны сабраліся з мэтай аб'яднання сваіх намаганняў у справе распаўсюджвання хрысціянскіх каштоўнасцяў праз сродкі масавай інфармацыі. Вынікам такой падзеі павінна было стаць стварэнне асацыяцыі, якая б аб'ядноўвала усе каталіцкія СМІ ў агульнай справе несці Божае Слова людзям.

На агульным сходзе быў падрабязна разгледжаны і зацверджаны Статут Асацыяцыі, былі выбраныя Прэзідыум Асацыяцыі, Старшыня Асацыяцыі і яго намеснікі. Першым Старшынёй стаў Юры Гарулёў. На канферэнцыі прысутнічалі таксама і замежныя госці, у тым ліку прэзідэнт Сусветнай Асацыяцыі SIGNIS Пітэр Мэлоўн.

Падчас сустрэчы ўдзельнікі мелі магчымасць абмену вопытам, абмяркоўвалі шляхі супрацоўніцтва, мелі шмат асабістых размоў. Была арганізавана прэзентацыя друкарнай, аўдыё- і відэа-прадукцыі.

Раніцай 11 верасня з удзельнікамі канферэнцыі сустрэўся Яго Эмінэнцыя кардынал Казімір Свёнтэк. Завяршылася канферэнцыя Святой Імшой, якую правёў Яго Эмінэнцыя, і на якой удзельнікі маліліся ў інтэнцыі новастворанай асацыяцыі.